Nange Paanv Chalna Aa Gaya..

Pahle Bachpan Fir Jawaani Fir Budhaape Ke Nishaan..
Umr Ko Bhi Dekhiye Kapde Badalna Aa Gaya..

Bichh Gaye Khud-Ba-Khud Raaston Mein Kitne Hi Gulaab..
Jab Humein Kaanton Pe Nange Paanv Chalna Aa Gaya..

Chand Ko Chhoone Kee Koshish Mein Toh Nakaami Mili..
Haan Magar Nadaan Bachcho Ko Uchhalna Aa Gaya..

Shukriya Aye Pattharon.. Behad Tumhara Shukriya..
Sar Jhuka Kar Jo Mujhe.. Raste Pe Chalna Aa Gaya..

Sirfiri Aandhi Ka Thoda Sa Sahaara Kya Mila..
Dhool Ko insaan Ke Sar Tak Uchhalna Aa Gaya

Roshni Ke Waaste Dhaage Ko Jalte Dekh Kar..
Lee Naseehat Mom Ne.. Usko Pighalna Aa Gaya..

Kya Hua Tumko Agar Chehare Badalna Aa Gaya..
Humko Bhi Halaat Ke Saanche Mein Dhalna Aa Gaya ..

.. ..